Anno 449. Hēr Martiānus and Valentīnus onfēngon rīċe, and rīcsodon seofon winter. And on hiera dagum Hengest and Horsa, fram Wyrtġeorne ġe-lāþode, Bretta cynginge, ġe-sōhton Bretene on þǣm stede þe is ġe-nemned Ypwines-flēot, ǣrest Brettum tō fultume, ac hīe eft on hīe fuhton. Se cyning het hīe feohtan on-ġēan Peohta; and hīe swā dydon, and siġe hæfdon swā hwǣr swā hīe cōmon. Hīe þā sendon tō Angle, and hēton him sendan māran fultum; and hēton him secgan Bret-weala nāhtnesse and þæs landes cysta. Hīe þā sendon him māran fultum. Þā cōmon þā men of þrīm mǣġþum Germānie, of Eald-seaxum, of Englum, of Īotum. Of Īotum cōmon Cant-ware and Wiht-ware þæt is sēo mǣġþ þe nū ġīet hætt ‘Īotena cynn’. Of Eald-seaxum comon Ēast-seaxe and Suþ-seaxe and West-seaxe. Of Angle cōmon — sē ā siþþan stōd wēste — be-twix Īotum and Seaxum Ēast-engle, Middel-engle, Mierċe, and ealle Norþ-hymbre.
Anno 455. Hēr Hengest and Horsa fuhton wiþ Wyrtġeorne þǣm cyninge in þǣre stōwe þe is ġe-cweden Æġles-þrep; and his brōþor Horsan man of-slog. And æfter þǣm Hengest fēng tō rīċe, and Æsc his sunu.
Anno 457. Hēr Hengest and Æsc fuhton wiþ Brettas in þǣre stōwe þe is ġe-cweden Crecgan-ford, and þǣr of-slōgon fēower þūsend wera. And þā Brettas þā for-lēton Cent-land, and mid micle eġe flugon tō Lunden-byriġ.
Anno 473. Hēr Hengest and Æsc ġe-fuhton wiþ Wealas, and ġe-namon unārīmedlicu here-rēaf, and þā Wealas flugon þā Engle swā swā fȳr.