I
Gif hors sīe ofscēoten,1 oþþe oþþer nēat, nīm ompran sǣd & Scittisc weax. Gesinge mon 12 mǣssan ofer & dō hālig wæter on þæt hors, oððe on swā hwīle nēat swā hit sīe. Hafa ðē wyrte simle mid.
II
Lǣcedom gif hors sīe ofscēoten; & wiþ ūtwærce; & gif ūtgang forseten sīe; & wiþ lencten ādle; eft wiþ ūtwærce & wiþ unlybbum & wiþ þǣre geolwan ādle; & gif men sīe fǣrlice yfele, & to gehealdanne līchōman hǣlo; & wiþ gīeþan & ælue; & wiþ lond-ādle & gongelwæfran bīte; wið ūtsihte & hēafod-sealfa.
III
Gif hors ofscēoten sīe, nīm þonne þæt seax, þe þæt hæfte sīe fealo hrȳþres horn, & sīen 3 ǣrene næglas on…2 Sȳ þæt ylfa þe him sīe, þis him mæg dō[n] bōte.
IV
Wiþ ælf ādle lǣcedom, & eft hū mon sceal on þā wyrte singan ǣr hī mon nīme, & eft hȳ mon sceal þā wyrta dōn under wēofod & ofer singan. & eft tācnu be þam hwæþer hit sīe ælf sogoþa, & tācn hū þū ongitan meaht hwæþer hine mon mæg gelācnian, & drencas & gebēdu wiþ ælcre fēndes costunge. Tācnu hū þū meaht ongitan hwæþer mon sīe on wæter ælf ādle, & lǣcedom wiþ þām, & gealdor on tō singanne, & þæt ilce mon mæg singan on wunda.